Arsenali siguroi me shumë vështirësi kualifikimin në gjysmëfinalen e Champions League, falë fitores 1-0 në ndeshjen e parë, ndërsa në kthim mjaftoi një barazim 0-0 në “Emirates”.
Skuadra e Mikel Arteta nuk dha paraqitjen bindëse që pritej dhe në disa momente u vu seriozisht në vështirësi nga Sporting CP, që ishte shumë pranë barazimit të përgjithshëm. Portugezët kërkuan edhe dy penallti gjatë ndeshjes, ndërsa goditën edhe shtyllën, por në fund nuk arritën të përmbysnin gjithçka.
Edhe pse Arsenali arriti objektivin dhe tani renditet mes katër skuadrave më të mira të Europës për sezonin e dytë radhazi, paraqitja la vend për dyshime. Londinezët u panë të tensionuar, pa shumë qartësi në lojë dhe me mungesën e zakonshme të rrjedhshmërisë që kishin treguar në faza të tjera të sezonit.
Atmosfera në “Emirates” ishte elektrizuese që në nisje, por skuadra vendase nuk arriti ta shfrytëzonte atë vrull në fushë. Sporting CP reagoi shpejt, mori kontrollin në disa momente dhe krijoi rastet më të mira, duke e bërë Arsenalin të vuante deri në sekondat e fundit.
Në pjesën e dytë, Arsenali provoi të zgjohej dhe krijoi disa raste me Eze, Martinelli dhe Madueke, por pikërisht në momentin më të mirë erdhi goditja tjetër për Arteta, pasi Madueke u detyrua të largohej për shkak të një dëmtimi në gju.
Në vend të tij u aktivizua talenti 16-vjeçar Max Dowman, i cili solli energji të re në repartin ofensiv, por pa mundur të zgjidhte përfundimisht fatin e ndeshjes. Në anën tjetër, Sporting CP vazhdoi të besonte deri në fund dhe ishte shumë pranë golit që do ta çonte përballjen në një tjetër drejtim.
Në fund, Arsenali ia doli të mbijetojë dhe të festojë kualifikimin, por paraqitja tregoi se skuadra e Arteta ka ende shumë për të përmirësuar nëse dëshiron të shkojë deri në fund në këtë edicion të Champions League.
