Arsenal është rikthyer në vendin e parë të Premier League pas fitores minimale 1-0 ndaj Newcastle në “Emirates”. Skuadra e Mikel Arteta përfitoi nga mungesa e Manchester City në kampionat, pasi “Citizens” ishin të angazhuar në gjysmëfinalen e FA Cup.
Goli vendimtar erdhi që në minutën e nëntë, kur Eze shënoi me një goditje të bukur nga jashtë zone, duke ndezur festën në stadium. Megjithatë, ndeshja nuk ishte aspak e lehtë për Arsenalin, pasi Newcastle reagoi dhe e mbajti sfidën të hapur deri në fund.
Fitorja u shoqërua edhe me shqetësime për Artetën. Havertz u detyrua të largohej i dëmtuar në pjesën e parë, ndërsa edhe autori i golit, Eze, u zëvendësua në pjesën e dytë. Këto janë dy probleme të rëndësishme përpara gjysmëfinales së Champions League ndaj Atletico Madridit dhe garës së fortë për titull me Manchester City.
Në fund, Arsenal vuajti presionin e Newcastle dhe shtatë minutat shtesë sollën shumë tension në “Emirates”. Megjithatë, londinezët rezistuan deri në fund dhe morën tri pikë jetike në luftën për titull.
