Martin Odegaard është një nga lojtarët më të talentuar të brezit të tij, por këtë sezon, kapiteni i Arsenalit nuk e ka pasur të lehtë. I dëmtuar më herët gjatë sezonit, norvegjezi është rikthyer në fushë – por shifrat e tij që atëherë kanë qenë zhgënjyese.
Në janar të vitit 2015, presidenti i Real Madridit, Florentino Perez, tronditi botën e futbollit duke firmosur me një adoleshent 16-vjeçar nga Norvegjia. Por trajneri i asaj kohe, Carlo Ancelotti, nuk ishte aspak i bindur nga ky vendim. Në librin e tij “Quiet Leadership”, italiani shkruante:
“Kur Florentino blen një futbollist norvegjez, thjesht duhet ta pranosh. Ai vendosi që Odegaard të luante tre ndeshje me ekipin e parë për arsye imazhi. Mund të bëhej më i miri në botë, por nuk më interesonte, sepse nuk ishte lojtar që e kërkova unë.”
Kjo ftohtësi e hershme i parapriu largimit të Odegaard nga Madrid në verën e vitit 2021, kur Ancelotti u kthye për herë të dytë në stolin e “Los Blancos”. Edhe pse kishte treguar potencial gjatë huazimeve, tekniku italian mendonte se kishte tetë mesfushorë më të mirë sesa norvegjezi.
Sot, katër vite më pas, shumë e kanë parë largimin e Odegaard si gabim të Realit – sidomos për çmimin relativisht të ulët prej 30 milionë paundësh. Megjithatë, sfida e radhës e norvegjezit kundër ish-trajnerit dhe ish-klubit të tij është një mundësi e artë për të provuar se ishte një talent që thjesht u nënvlerësua.
Arsenal i kapur në befasi – dhe Odegaard nën lupë
Ky sezon pritej të ishte viti i Arsenalit. Pas dy sezoneve ku i shkuan shumë afër titullit të Premier League, ideja ishte që ky ekip i ri, me Odegaardin si lider, të ishte më në fund gati për të përmbysur dominimin e Manchester City-t. Por në vend që të përfitonte nga rënia e ritmit të Guardiolës, ishte Liverpool që mori kryesimin. Dhe pas humbjes me Fulham-in, Arsenal ndodhet jashtë gare me një diferencë të madhe pikësh.
Edhe pse dëmtimet kanë luajtur rol – Odegaard mungoi për rreth dy muaj për shkak të një dëmtimi në kyçin e këmbës – problemi më i madh ka qenë kontributi i tij pas rikthimit në fushë. Statistikat janë të varfra: vetëm dy asistime që prej kthimit në formë, duke ngritur dyshime të forta për rolin dhe ndikimin e tij në këtë skuadër.
Ish-mbrojtësi i Arsenalit, William Gallas, u shpreh së fundmi:
“Çfarë po ndodh me të? Nuk duket si lojtari që kemi parë dy sezonet e fundit. Ka qenë nën nivelin e tij.”
Mungesa e ritmit dhe vendimmarrjet e ngadalta e kanë bërë Artetën që herë pas here ta heqë nga loja, madje edhe në ndeshje ku Arsenali kishte nevojë për kreativitet – diçka e paimagjinueshme më parë.
Vetëkritik dhe nën presion
Vetë Odegaard e ka pranuar se nuk ka qenë në nivelin e duhur:
“Jam shumë kritik ndaj vetes. E di që nuk kam qenë i mirë, sidomos përpara portës,” tha ai në mars. Me vetëm 5 gola në 34 ndeshje këtë sezon, lojtari që dy sezonet e fundit i kishte kaluar shifrat dyshifrore, është larg versionit më të mirë të vetes.
Edhe ish-mbrojtësi i Liverpool-it, John Arne Riise, ka thënë se Odegaard duket sikur po përpiqet shumë, duke e bërë lojën më të rëndë dhe më pak spontane:
“E ndjen që po e gjykojnë dhe po përpiqet shumë për të treguar të njëjtën formë si vitin e kaluar – dhe kjo nuk funksionon gjithmonë.”
Saka rikthehet – dhe me të, rikthehen pritshmëritë
Mungesa e bashkëlojtarëve kyç ka ndikuar në performancën e Odegaard. Gabriel Jesus është jashtë sezonit, Kai Havertz gjithashtu mungon, dhe trajneri është detyruar të improvizojë. Por më e rënda ishte mungesa e Bukayo Saka për katër muaj – një partneritet që ka qenë shtylla kreative e skuadrës.
“Kur ke një lidhje kaq të mirë me një lojtar dhe ai mungon, ndjehet menjëherë,” tha Arteta më parë.
Me rikthimin e Saka-s, loja e Odegaard ka shansin të marrë frymë sërish. Përballja me Real Madridin nuk është thjesht një çështje Champions-i. Është edhe një moment simbolik: përballë trajnerit që nuk e besoi, dhe përballë kritikëve që po vënë në dyshim klasën e tij.
Shansi për të treguar veten – një herë e mirë
Me ëndrrat për Premier League të shuar, Champions League mbetet rruga e vetme ku Odegaard mund të shkëlqejë. Para pak ditësh, ai tregoi një formë pozitive me tre asistime për Norvegjinë në një ndeshje kundër Izraelit – dhe fansat e Arsenalit po shpresojnë që kjo të shndërrohet në një kthesë edhe për klubin.
Nuk ka më justifikime. Jo më dëmtime. Jo më mungesë bashkëlojtarësh. Ky është momenti që Martin Odegaard – futbollisti që Carlo Ancelotti s’e donte – të tregojë se nuk ishte një nënshkrim për PR, por një talent i vërtetë që tani është gati të bëjë histori.
