Sipas “Daily Mail”, Arsenal dhe Real Sociedad kanë arritur marrëveshjen për transferimin e Martin Zubimendi-t në Londër në fund të këtij sezoni.
Dy klubet kanë muaj që negociojnë mes tyre dhe vetëm tani duket se kanë gjetur dakordësinë. Për 25-vjeçarin ka pasur interes të madh dhe nga dy klubet e tjera të Premier League, Liverpool dhe Manchester City, por “Topçinjtë” janë treguar më të zotët.
“Daily Mail” zbulon se Arsenal ka insistuar që lojtari të transferohet që tani në Londër, por Real Sociedad ka qenë i prerë dhe ka vendosur që Zubimendi do qëndrojë me ta deri në fund të sezonit.
Transferimi i Zubimendi-t do të sjellë një revolucion në mesfushën e Arsenal-it, ku Thomas Partey dhe Jorginho do jenë dy të larguarit e parë me ardhjen e spanjollit.
Jorginho pritet të transferohet në Brazil, ndërsa për Partey ka interes nga disa klube të tjera në Premier League, por nuk përjashtohet dhe transferimi në Arabinë Saudite.
