Drejtoria Vendore e Policisë Vlorë, në bashkëpunim me Seksionin për Hetimin e Krimeve Ekonomike dhe Financiare dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Vlorë, ka finalizuar me sukses operacionin policor të koduar “MATËSI”, i cili çoi në goditjen e një rasti të korrupsionit dhe shpërdorimit të detyrës.
Gjatë këtij operacioni u arrestua në flagrancë shtetasi M. S., 35 vjeç, me detyrë shef ekipi për lexuesit e matësave të energjisë elektrike pranë OSSH Vlorë. Ai u kap në momentin që po merrte 100 euro nga një subjekt privat, në këmbim të një favorizimi për pagesën e energjisë elektrike, përmes ndërhyrjes në matësin elektrik.
Po ashtu, në pranga ra edhe L. H., 42 vjeç, i cili ndodhej në masën e sigurisë “arrest në shtëpi” për veprën penale “Prodhimi dhe shitja e narkotikëve”. Ai u kap në shoqërinë e punonjësit të OSSH-së, duke shkelur vendimin e gjykatës dhe do të përballet me akuzën “Largimi i të burgosurit nga vendi i qëndrimit”.
Gjatë operacionit u sekuestruan si prova materiale 100 euro, dy aparate celularë dhe një automjet.
Policia njofton se hetimet janë ende në vijim për të zbardhur të tjera raste të mundshme të përfshirjes në veprimtari të paligjshme dhe për të identifikuar persona të tjerë të përfshirë.
Materialet procedurale i janë referuar Prokurorisë për veprime të mëtejshme ligjore.
