Gjykata e Apelit të Kosovës ka vendosur ta uli dënimin për Tom Dodajn, i akuzuar për shitjen e armës, me të cilën dyshohet se u vra Liridona Ademaj më 29 nëntor 2023. Në shkurt të vitit 2025, Dodaj kishte pranuar fajësinë për shitje të paautorizuar të armëve, duke u dënuar me pesë vjet burgim dhe 5 mijë euro gjobë. Megjithatë, Apeli e uli dënimin në tre vjet burgim dhe 3 mijë euro gjobë.
Gjykata e Apelit konsideroi se dënimi i shqiptuar nga shkalla e parë ishte “i ashpër” dhe përmendi disa faktorë për uljen e tij, si pranimin e fajësisë nga Dodaj, kërkimfaljen ndaj familjes së viktimës, dhe faktin se ai nuk kishte qenë i vetdijshëm për qëllimin e përdorimit të armës që kishte shitur. Në arsyetimin e saj, Apeli theksoi se kjo ishte hera e parë që Dodaj kishte shkelur ligjin dhe se një dënim më i ulët mund të arrinte qëllimin ndëshkimor të përcaktuar nga Kodi i Procedurës Penale.
Aktualisht, për vrasjen e Liridona Ademaj po akuzohen tre persona: bashkëshorti i saj, Naim Murseli, Granit Pllana, dhe Kushtrim Kokalla. Murseli e ka planifikuar vrasjen e bashkëshortes për hakmarrje dhe përfitim financiar nga një sigurim jetësor në Suedi, duke bashkëpunuar me Kokallën dhe Plavën, të cilëve u kishte premtuar një shpërblim prej 30 mijë eurosh. Ngjarja ka shkaktuar zemërim publik, sidomos pas pjesëmarrjes së Murselit në ceremoninë e varrimit.
Familja e viktimës ka kërkuar zhvarrosjen e trupit për ta varrosur sipas traditave të familjes Ademaj. Nga viti 2010, rreth 60 gra janë vrarë në Kosovë, kryesisht nga bashkëshortët e tyre. Organizatat për mbrojtjen e të drejtave të njeriut e kritikojnë sistemin e drejtësisë për dënime të lehta për autorët e këtyre krimeve, duke argumentuar se kjo i inkurajon dhunuesit.
