Carlo Ancelotti ka dalë në mbështetje të mundësisë që Jose Mourinho të rikthehet në krye të Real Madrid, në një moment kur madrilenët po kalojnë një periudhë të vështirë dhe pritet të marrin një vendim të rëndësishëm për trajnerin e ardhshëm.
Ish-trajneri i Real Madrid, i cili aktualisht drejton kombëtaren e Brazil, ka folur për The Athletic dhe ka vlerësuar maksimalisht Mourinho, duke thënë se portugezi ka cilësitë e duhura për të drejtuar sërish në Santiago Bernabéu.
“Nëse rikthehet te Real Madrid, do të jem shumë i lumtur për të. Ai mund të bëjë një punë fantastike, siç ka bërë gjithmonë në klubet ku ka qenë”, u shpreh Ancelotti.
Italiani hodhi poshtë edhe raportimet se lojtarët e Real Madrid bëjnë çfarë duan në dhomën e zhveshjes. Sipas tij, kjo nuk është aspak e vërtetë dhe skuadra gjithmonë ka ndjekur një strategji të qartë.
“Është absolutisht e pavërtetë. Kur isha aty, kisha një ide dhe e diskutoja me lojtarët. Ata duhet të jenë pjesë e idesë, por kjo nuk do të thotë se nuk kishte strategji. Ne kishim një strategji të fortë, sepse fituam dy Champions League në katër vite”, tha Ancelotti.
Sipas tij, çelësi i suksesit te Real Madrid nuk është vetëm taktika, por edhe mënyra si trajneri krijon marrëdhënie me lojtarët. Ancelotti theksoi se gjithmonë është përpjekur të ndërtojë raport me personin, jo vetëm me futbollistin.
Trajneri italian shtoi se Real Madrid ka nevojë për kohë për të rindërtuar ekuilibrin brenda skuadrës. Sipas tij, për të pasur sukses nuk mjafton vetëm cilësia teknike, por duhet edhe harmoni dhe stabilitet në grup.
Ndërkohë, Alvaro Arbeloa pritet të qëndrojë në krye të skuadrës për tre ndeshjet e fundit të sezonit në La Liga, ndaj Real Oviedo, Sevilla dhe Athletic Club, përpara se klubi të japë më shumë qartësi për trajnerin e ardhshëm.
