Legjenda italiane e futbollit dhe trajneri me më shumë trofe në historinë e Real Madridit, Carlo Ancelotti, ka folur në një intervistë ekskluzive për AS, ku ka rrëfyer kujtimet e tij të paharrueshme në “Santiago Bernabéu”, marrëdhënien me ish-lojtarët e tij dhe përvojën e re si trajner i Brazilit.
Ancelotti, fitues i 15 trofeve me madrilenët, foli me nostalgji për periudhën e tij të artë në krye të klubit dhe për magjinë e mbrëmjeve të paharrueshme të Champions-it:
“Ishte një periudhë spektakolare. Jo vetëm për titujt, por për mënyrën si i fituam. Ato përmbysje kundër PSG, Chelsea, City apo Bayern nuk harrohen kurrë. Është diçka që e ndien vetëm Real Madridi.”
Sa i përket të tashmes së klubit, Ancelotti u shpreh me bindje për trajnerin aktual:
“Xabi Alonso po bën një punë të shkëlqyer. Kam qenë i bindur që një ditë do të bëhej trajner i madh. Ka një vizion të jashtëzakonshëm për lojën dhe një karakter të fortë. E shoh ekipin shumë solid në mbrojtje dhe shumë të fortë në sulm. Besoj se Xabi do të ketë sukses pa asnjë dyshim.”
Italiani shtoi me humor:
“Në Madrid, një barazim është preludi i një krize. Duhet të mësosh të jetosh me këtë presion. Por rezultatet e tij janë spektakolare: kryeson La Ligën dhe është mes tetë më të mirave në Champions. Çfarë mund të kërkosh më shumë?”
Në intervistë, Ancelotti foli edhe për ish-lojtarët e tij Vinicius, Rodrygo, Modrić, Casemiro dhe Cristiano Ronaldo, duke nënvizuar profesionalizmin dhe pasionin e tyre të pashtershëm:
“Cristiano do ta arrijë golin e tij të 1,000-të, nuk kam asnjë dyshim. Ai është fenomenal, si Luka Modrić. Të dy e duan futbollin dhe jetojnë për të.”
Sa i përket eksperiencës në Brazil, trajneri 65-vjeçar tha se është i lumtur dhe i qetë:
“Është një punë ndryshe, më shumë vëzhguese sesa ndërhyrëse. Jam i lumtur në Rio dhe dua ta rikthej Brazilin në majën e botës.”
Në fund, Ancelotti nuk harroi të mbyllte me një mesazh për tifozët e bardhë:
“Ka qenë një kënaqësi të jem pjesë e historisë së Real Madridit. Dhe si gjithmonë… Hala Madrid!”
