Presidenti Donald Trump ka vendosur të anulojë mbrojtjen e ‘Secret Service’ për ish-Zëvendëspresidenten Kamala Harris, vetëm shtatë muaj pas largimit të saj nga detyra. Ky vendim ka shkaktuar polemika në politikën amerikane, sidomos tani që Harris pritet të nisë një turne të gjerë kombëtar për promovimin e librit të saj, “107 Days”, që trajton periudhën e kandidaturës së saj presidenciale në vitin 2024, sipas raportimeve të BBC-së.
Sipas ligjit federal të vitit 2008, ish-zëvendëspresidentët dhe familjet e tyre përfitojnë mbrojtje nga ‘Secret Service’ për gjashtë muaj pas përfundimit të mandatit, me mundësi zgjatjeje në raste të veçanta nga Sekretari i Sigurisë Kombëtare. Pas konsultimeve, Joe Biden kishte firmosur një urdhër për të zgjatur mbrojtjen për Harris me një vit, por Trump e ka anuluar këtë vendim.
Edhe pse një vlerësim i fundit nuk ka identifikuar kërcënime të menjëhershme ndaj Harris, stafi i saj është shprehur se si figura e parë femër dhe me ngjyrë në këtë rol, ajo është e ekspozuar ndaj kërcënimeve të urrejtjes. Në vitin 2024, disa individë janë arrestuar për kërcënime direkte ndaj saj, duke përfshirë plane atentati.
Reagimet politike kanë qenë të ashpra, përfshirë nga Guvernatori i Kalifornisë, Gavin Newsom, i cili e ka quajtur vendimin “politikanisht të motivuar dhe hakmarrës.” Ai tha se “siguria e zyrtarëve publikë nuk duhet të jetë lojë politike”.
Sipas analistit Ronald Kessler, vendimi i Trump ka një anë praktike pasi ‘Secret Service’ është i mbingarkuar. Ai theksoi se turin i librit të Harris kërkon një sasi të madhe burimesh, që agjencia tashmë e ka të vështirë t’i ofrojë. Kessler po ashtu theksoi se Trump ka hequr mbrojtjen edhe për figura të tjera, duke e parë këtë si pjesë të një spastrimi të gjerë politik.
Ndryshe nga ish-zëvendësit, ish-presidentët amerikanë gëzojnë mbrojtje të përjetshme nga ‘Secret Service’. Kamala Harris do të detyrohet të kërkojë mbrojtje private për turneun e saj, një kosto që mund të arrijë miliona dollarë në vit.
