Historia e Álvaro Morata-s dhe Alice Campello-s duket se ka mbërritur në fund. Futbollisti i ka konfirmuar gazetarit Javi de Hoyos se çifti ka nisur zyrtarisht procedurat e divorcit, duke theksuar edhe një detaj të rëndësishëm: nuk ka asnjë palë të tretë të përfshirë në këtë situatë.
Sipas gazetarit, avokatët e të dyja palëve tashmë po merren me dokumentacionin e nevojshëm. Sulmuesi 33-vjeçar dhe influencerja 30-vjeçare po ndahen pas nëntë vitesh martese, gjatë të cilave kanë sjellë në jetë katër fëmijë. Burime pranë çiftit theksojnë se vendimi është marrë me mendim të gjatë dhe pa konflikte të ashpra, edhe pse emocionalisht kjo periudhë po rezulton shumë e vështirë për të dy.
Pas një krize në verën e 2024-ës, Morata dhe Campello tentuan t’i jepnin marrëdhënies një shans të dytë. Ata u ribashkuan dhe e shfaqën lumturinë edhe në rrjete sociale me foto së bashku dhe mesazhe të ndjera, duke lënë përshtypjen se momentet e vështira kishin kaluar. Por një valë e re problemesh doli vendimtare dhe kësaj here pajtimi nuk mjaftoi për ta shpëtuar martesën.
Javi de Hoyos, i cili thotë se ka folur personalisht me Morata-n, shton se futbollisti vazhdon ta konsiderojë Alice “gruan e jetës së tij”. Sipas tij, ata do të ruajnë lidhjen familjare për hir të fëmijëve dhe do të përpiqen të sillen me respekt maksimal ndaj njëri-tjetrit, por fatkeqësisht, shansi i dytë nuk funksionoi.
