Massimiliano Allegri është shumë pranë rikthimit në stol, këtë herë te Napoli. Sipas Gazzetta dello Sport, presidenti Aurelio De Laurentiis ka zgjedhur ish-trajnerin e Milanit si pasuesin e Antonio Conte.
Allegri duket se ka fituar garën me Vincenzo Italiano, i cili sapo është liruar nga Bologna dhe ishte një tjetër emër i vlerësuar nga drejtuesit e Napolit. Megjithatë, në orët e fundit ka pasur një kthesë të rëndësishme në favor të Max.
De Laurentiis e ka pëlqyer prej kohësh Allegrin, madje që nga viti 2019, dhe tani mundësia për ta sjellë në Campania duket më konkrete se kurrë. Largimi i tij nga Milan i hapi menjëherë rrugë lëvizjes së Napolit.
Presidenti i Napolit ka vepruar shpejt, pasi Allegri mund të konsiderohej edhe si kandidat i mundshëm për kombëtaren italiane. Nga ana tjetër, Vincenzo Italiano mbeti në garë deri në fund dhe pati edhe një takim pozitiv me De Laurentiis.
Një rol të rëndësishëm në këtë zgjedhje mund të ketë Giovanni Manna, i cili e njeh mirë Allegrin nga periudha te Juventus dhe e vlerëson shumë profilin e tij.
Tani mbetet për t’u zgjidhur situata kontraktuale me Milanin, pasi Allegri ka ende një vit kontratë me klubin kuqezi. Megjithatë, sipas raportimeve në Itali, ai është më pak se një hap larg stolit të Napolit.
