Tiranë, 30 maj 2025 – Rreth orës 19:35, në Sallën Operative të Drejtorisë Vendore të Policisë Tiranë ka mbërritur një telefonatë nga një punonjëse e stafit të një hoteli në rrugën “Abdi Toptani”. Sipas denoncimit, punonjësja është njoftuar nga një person i panjohur për vendosjen e një sasie eksplozivi në parkimin e hotelit.
Menjëherë pas marrjes së informacionit, forca të shumta policie kanë mbërritur në vendngjarje, duke rrethuar zonën dhe duke bërë evakuimin e menjëhershëm të stafit dhe klientëve të hotelit.
Gjithashtu, në vend janë thirrur forcat xheniere, të cilat po kryejnë kontrollin e imtësishëm të zonës për të verifikuar praninë e ndonjë mjeti të dyshimtë ose lëndë shpërthyese.
Policia njofton se në përfundim të kontrolleve dhe veprimeve hetimore, do të ofrohet një informacion më i detajuar lidhur me rastin.
Hetimet janë në vijim.
