Tiranë, 30 maj 2025 – Pas një telefonate anonime që njoftonte për vendosjen e një sasie eksplozivi në parkimin e një hoteli në rrugën “Abdi Toptani”, forcat e Policisë së Tiranës ndërhynë menjëherë duke rrethuar zonën dhe evakuuar godinën për arsye sigurie.
Në bashkëpunim me forcat xheniere, u krye një kontroll i imtësishëm në të gjithë perimetrin e hotelit. Pas verifikimeve, u konstatua se alarmi ishte i rremë dhe nuk u gjet asnjë mjet i dyshimtë apo lëndë shpërthyese.
Policia ka nisur hetimet për të identifikuar autorin e telefonatës që shkaktoi panik dhe për të përcaktuar nëse kemi të bëjmë me një veprim të qëllimshëm për shqetësim publik.
Ngjarja ka përfunduar pa pasoja dhe situata në zonë është kthyer në normalitet.
