Tension te Juventusi. Negociatat për rinovimin e kontratës së Kenan Yildiz deri në vitin 2030 janë bllokuar, duke ndezur alarmin në Torino dhe duke zgjuar interesin e gjigantëve të Europës.
Sipas La Gazzetta dello Sport, bisedimet mes drejtorit ekzekutiv Damien Comolli dhe përfaqësuesve të futbollistit janë ndalur pas takimit të fundit, pasi palët nuk kanë arritur marrëveshje as për pagën dhe as për disa klauzola kontraktuale. Turku kërkon një pagë që të reflektojë statusin e tij si një nga figurat kryesore të skuadrës – rreth 6 milionë euro në vit, të ngjashme me atë të Jonathan David, ndërsa oferta e Juventusit mbetet më e ulët me rreth një milion euro.
Aktualisht, Yildiz fiton 1.7 milionë euro plus bonuse, një shifër modeste për lojtarin që mban numrin 10 dhe është bërë fytyra komerciale më e shitur e klubit. Vetëm ndërhyrja e John Elkann, CEO i Exor, mund të zhbllokojë situatën, pasi ai është një prej admiruesve më të mëdhenj të talentit turk.
Në prapaskenë, Chelsea, Real Madrid dhe Arsenal janë gati të përfitojnë. Chelsea ofroi 67 milionë euro në verën e kaluar, dhe nëse Yildiz del në merkato verën e ardhshme, çmimi i tij mund të kalojë 100 milionë euro.
Megjithë tensionet, raporti mes Yildiz dhe klubit mbetet i qëndrueshëm. Ai ka luajtur me sakrificë pavarësisht problemeve fizike, duke treguar përkushtim dhe lidership në periudhën më të vështirë të sezonit.
