Lumi Seman ka shkaktuar dëme të konsiderueshme në zonën e Mbrostarit, pasi ka dalë nga shtrati, duke krijuar një situatë alarmante për banorët dhe fermerët e zonës.
Përmbytjet kanë goditur rëndë sektorin e bujqësisë dhe blegtorisë, duke shkaktuar dëme të mëdha në bazën ushqimore për bagëtitë, si dhe humbje të kafshëve, përfshirë bagëti të imta, dele dhe shpendë në ferma pulash. Sipas të dhënave paraprake, rreth 10% e fermave në këtë zonë kanë pësuar dëme të drejtpërdrejta, duke rrezikuar seriozisht ekonominë dhe jetesën e fermerëve.
Situata mbetet e vështirë edhe për banesat dhe bizneset lokale, të cilat janë prekur nga uji, duke shkaktuar humbje materiale dhe vështirësi në aktivitetin e përditshëm.
Përveç Mbrostarit, përmbytjet nga lumi Seman kanë prekur edhe zona të tjera përreth, si Grecalli, Mujalli, Beline dhe Petovë, ku banorët raportojnë dëme të ngjashme dhe kërkojnë ndërhyrje të menjëhershme nga autoritetet.
