Pas mbylljes së shkollave në Santorini për pesë ditë, autoritetet njoftuan se mbyllje të ngjashme do të ketë edhe në ishujt e tjerë të Cyclades, si Mykonos, Paros dhe Tinos. Ky vendim është marrë pas një aktiviteti të lartë sizmik në rajon, ku në shtatë ditët e fundit janë regjistruar mbi 555 tërmete me magnitudë nga 2 deri në 5.1 Rihter, sipas EMSC.
Në Paros dhe Tinos, shkollat, kopshtet dhe çerdhet do të mbyllen për dy ditë, më 4 dhe 5 shkurt, si masë parandalimi. Ndërkohë, në Mykonos, mbyllja do të jetë vetëm për datën 4 shkurt. Aktiviteti sizmik ka shtyrë shumë banorë dhe turistë të largohen nga ishulli i Santorinit, duke krijuar një fluks të lartë në aeroport.
Komiteti i Sizmologëve mblodhi një takim urgjent sot në prani të ministrit të krizës klimatike, Vasilis Kikilias dhe zv.ministrit Evangelos Tournas. Në përfundim të mbledhjes, u vendos që shkollat të mbesin të mbyllura deri më 7 shkurt në ishujt Thira, Anafi, Ios dhe Amorgos. Qytetarët janë udhëzuar me disa rekomandime për t’u mbrojtur nga pasojat e mundshme të tërmeteve, si shmangia e ndërtesave të vjetra dhe qëndrimi larg bregdetit gjatë lëkundjeve.
