Pas një dekade përpjekjesh të pandalshme për të mbrojtur lumin Vjosa nga ndërtimi i hidrocentraleve, dy aktivistët shqiptarë, Olsi Nika dhe Besjana Guri, janë nderuar me çmimin ndërkombëtar për mjedisin “Goldman” për vitin 2025, shpërblimi më i lartë në botë për aktivistët mjedisorë, shpesh i quajtur edhe “Nobeli i gjelbër”.
Puna e tyre kulmoi me shpalljen e Vjosës si Park Kombëtar nga qeveria shqiptare, një vendim historik që garanton mbrojtjen e 270 kilometrave të lumit dhe degëve të tij, në total 400 kilometra të korridoreve natyrore lumore që përshkojnë Shqipërinë.
“Parku Kombëtar i Vjosës është një model unik që Shqipëria i ofron Europës dhe botës, duke treguar se si mund të mbrohen ekosistemet ujore që po zhduken me shpejtësi,” u shpreh Olsi Nika. Ai shtoi se sfida e radhës është zbatimi dhe përmirësimi i planit të menaxhimit të parkut.
Edhe për Besjana Gurin, shpërblimi nuk përfaqëson një fund, por një fillim të ri. “Puna ime me Vjosën nuk mbaron këtu, nuk përfundoi as dy vite më parë kur ajo u shpall Park Kombëtar. Ky çmim është një motivim i madh për të vazhduar angazhimin tim, veçanërisht për mbrojtjen e Shushicës, një degë e rëndësishme e Vjosës që rrezikon devijimin e ujërave të saj,” tha ajo.
Çmimi “Goldman” jepet çdo vit për aktivistë nga gjashtë kontinente, që kanë treguar guxim të jashtëzakonshëm në mbrojtjen e mjedisit dhe të komuniteteve të tyre. “Në një vit të mbushur me sfida për njerëzit dhe planetin, këta liderë na japin shpresë,” deklaroi Jennifer Goldman Wallis, nënkryetare e Fondacionit Goldman.
