Një aksident i rëndë ka ndodhur të enjten në zonën Rashçe-Saraj, Maqedonia e Veriut, ku një automjet ka përfunduar në lumin Vardar në rrethana ende të paqarta.
Ekipet e shpëtimit kanë dalë menjëherë në vendin e ngjarjes. Nga automjeti u gjetën trupat e pajetë të tre grave, të cilat janë konfirmuar si viktimat e aksidentit tragjik.
Fëmija 5-vjeçar mbijeton aksidentin
Një nga pasagjerët, një djalë 5-vjeçar, arriti të dalë nga automjeti para se ai të binte në lumë. Fëmija është gjetur nga kalimtarë të rastit dhe është dërguar menjëherë në spital për të marrë ndihmë mjekësore.
Kërkimet për personin e katërt të pezulluara
Raportohet se në veturë ishte edhe një person tjetër, një burrë, i cili vazhdon të jetë i zhdukur. Megjithatë, për shkak të kushteve atmosferike të vështira, operacionet e kërkimit janë pezulluar për momentin.
Autoritetet vazhdojnë hetimet për të zbardhur shkaqet e aksidentit.
