Sergio Aguero ka shpërthyer në elozhe për Lamine Yamal, duke thënë se talenti i ri i Barcelona është tashmë mbi pothuajse çdo lojtar tjetër në botë, me përjashtim të vetëm një emri.
Ish-sulmuesi i Manchester City dhe Barcelona beson se Yamal ka një cilësi të rrallë, që në “Camp Nou” nuk është parë që nga koha e Lionel Messi.
Duke folur për Stake, Aguero u shpreh i mahnitur nga niveli që ka arritur 18-vjeçari në një moshë kaq të re.
“Ka shumë njerëz që bëjnë krahasime të ndryshme, por si lojtar dhe nga eksperienca ime në futboll, ai është në nivelin e më të mirëve. Të kesh ndeshje të mira dhe të këqija është normale, por unë dua që të gjithë ta shohin. Lëvizjet, pasimet, driblimet, shkathtësia që ka dhe mënyra si del nga situata që duken të pamundura… lojtari që e bënte këtë më parë ishte Leo Messi”, deklaroi Aguero.
Sipas tij, vetëm Kylian Mbappe mund të vendoset aktualisht mbi Yamal, por edhe në këtë rast ai theksoi se sulmuesi i Barcelona ka cilësi të veçanta që e bëjnë ndryshe nga të tjerët.
“Sot, për mua, nuk ka krahasim. Lamine është mbi shumë lojtarë. Ndoshta mund të thuash Mbappe, sepse e dimë çfarë lojtari është, shumë agresiv në një kundër një, ka gola dhe është shumë i mirë. Por Lamine ka gjëra të tjera që nuk i kanë shumë lojtarë. Më pëlqejnë ato pasimet e shkurtra dhe ato vendime… janë ndryshe. Është shumë e vështirë ta ndalësh Lamine”, shtoi ai.
Sezoni i Yamal ka qenë fantastik edhe në aspektin statistikor. Ai ka regjistruar 23 gola dhe 18 asistime në të gjitha kompeticionet, duke u kthyer në një nga figurat kryesore të Barcelona.
Aguero pranoi se kishte mbetur pa fjalë kur e pa për herë të parë të shpërthente me ekipin e parë.
“Kur nisa ta shihja Barcelona pasi ai shpërtheu, nuk kisha fjalë për ta përshkruar. Ka një talent që është shumë i vështirë për t’u gjetur. Duhet thjesht ta shijosh”, u shpreh argjentinasi.
Edhe pse ëndrra për Champions League u mbyll me zhgënjim, Yamal mbetet një nga armët kryesore të skuadrës së Hansi Flick në garën për titullin në La Liga.
