Agjenti i Julian Alvarez, Fernando Hidalgo, ka reaguar ashpër ndaj raportimeve se sulmuesi i Atletico Madrid po kërkon shtëpi në Barcelonë, mes zërave për një transferim të mundshëm te katalanasit gjatë verës.
Sipas lajmeve të fundit, vëllezërit e Alvarez ishin parë në Barcelonë duke kërkuar pronë, por Hidalgo i ka quajtur këto pretendime “tërësisht të pavërteta”. Ai sqaroi se familja e lojtarit ka qenë në Barcelonë vetëm për ndeshjen ndaj Atletico Madrid dhe është kthyer menjëherë në Madrid ditën pasuese.
“1000% e pavërtetë. Askush nga familja nuk ka qenë në Barcelonë. Hera e fundit ishte për ndeshjen ndaj Atletico dhe u kthyen në Madrid të nesërmen”, deklaroi agjenti për Mundo Deportivo.
Megjithatë, e ardhmja e Alvarez mbetet një temë e hapur. Vetë sulmuesi ka deklaruar më parë se është i lumtur te Atletico Madrid, por nuk e ka përjashtuar plotësisht mundësinë e një largimi.
Barcelona vazhdon të jetë në kërkim të një sulmuesi afatgjatë për të pasuar Robert Lewandowski, dhe Alvarez mbetet një nga emrat më të pëlqyer në listën e klubit katalanas.
