Forumi seksist “Phica”, i cili ka provokuar polemika për publikimin e fotove të politikaneve dhe grave me komente vulgare, tani ka një administrator të identifikuar. Sipas një hetimi nga gazetën Domani, emri i tij është Vittorio Vitiello, një 45-vjeçar nga Pompei që jeton në Firence. Zbulimi erdhi pas një ankese nga kryebashkiakja e Firences, Sara Funaro, shënjestra e disa prej postimeve të dëmshme në platformë.
Vitiello, që zotëron një kompani në fushën e reklamave me influencues, është marrë në pyetje nga autoritetet italiane për akuzat e shantazhit dhe ofrimit të shërbimeve me pagesë për heqjen e përmbajtjeve të publikuara. Analiza e ekspertit të inteligjencës kibernetike, Alex Orlowsky, ka treguar se Vitiello operonte nën emrat e koduar “Bossmiao” dhe “Phicamaster”, duke iu kërkuar viktimave pagesa për shërbime të tilla. Çmimet për heqjen e postimeve varionin nga 250 deri në 1,000 euro, duke ofruar “paketa mbrojtjeje” që përfshinin heqjen e përmbajtjeve dhe dërgimin e provave.
Një rast konkret tregoi se Vitiello kishte kërkuar 700 euro për 30 ditë “mbrojtje”, duke e krahasuar shërbimin e tij me një piceri, dhe pas negociatash, çmimi u ul në 300 euro, me mundësi pagese në kriptomonedha. Ndërsa faqja “Phica.eu” ka bllokuar diskutimet, ajo vazhdon të mbetet aktive për përmbajtje pornografike, e cila është e aksesueshme për çdo përdorues, përfshirë të miturit.
Më 2 shtator, administratori mohoi akuzat për shantazh, duke thënë se shërbimet e tij ishin opsionale dhe jo të shfrytëzuese. Megjithatë, autoritetet italiane po hetojnë situatën për shkelje të rënda, duke përfshirë akuzat për shantazh dhe përhapjen e përmbajtjes së papërshtatshme.
Ky rast ka ngritur debate të forta mbi abuzimin online dhe mbrojtjen e grave, si dhe mbi nevojën për filtrat që parandalojnë aksesin e të miturve në përmbajtje pornografike. Hetimet pritet të thellohen në ditët në vijim.
