Mesfushori i AC Milan, Ruben Loftus-Cheek, u detyrua të lërë fushën vetëm pas dhjetë minutash lojë, pasi pësoi një goditje të fortë në nofull gjatë një përplasjeje në ajër me portierin e Parma Calcio 1913, Corvi. Lojtari ra në tokë i tronditur dhe me dhimbje në kokë e në zonën e nofullës.
Sipas raportimeve, dëmtimi rezultoi serioz: Loftus-Cheek ka pësuar traumë të rëndë në nofull dhe i janë thyer disa dhëmbë. Ai u nxor nga fusha me barrelë dhe u dërgua menjëherë në spital për kontrolle mjekësore. Në vend të tij u aktivizua Jashari.
Trajneri në stol, Landucci (zëvendës i Allegri-t të pezulluar), u detyrua të bëjë zëvendësimin e menjëhershëm. Ekzaminimet në orët në vijim pritet të sqarojnë plotësisht natyrën e dëmtimit, por ka edhe një sinjal lehtësues: lojtari ka qëndruar i vetëdijshëm gjatë gjithë kohës.
