Ambasadori i Bashkimit Evropian në Kosovë, Aivo Orav, ka apeluar për bashkëpunim midis partive politike të Kosovës për të krijuar një shumicë të fortë që do të sigurojë zbatimin e reformave dhe ratifikimin e marrëveshjeve të rëndësishme për zhvillimin e vendit. Gjatë një konference për media, në të cilën mori pjesë edhe kryeministri në detyrë Albin Kurti, Orav theksoi se Europa po kalon një periudhë vendimtare, ku zgjerimi i BE-së përbën një imperativ strategjik për stabilitetin dhe prosperitetin e rajonit.
Ambasadori vuri në dukje se fqinjët e Kosovës, Shqipëria dhe Mali i Zi, po ecin në rrugën e duhur drejt integrimit evropian, ndërsa për Kosovën, ky vit është vlerësuar si një hap mbrapa. Ai bëri të qartë se përparimi në rrugën drejt Europës kërkon një qeveri të qëndrueshme dhe me shumicë solide që mund të implementojë Planin e Rritjes dhe të përmbushë detyrimet ndaj dialogut me Serbinë.
Orav identifikoi gjashtë fushat kryesore ku Kosova ka arritur përparim: gjyqësori, zhvillimi social, politikat e transportit, siguria e ushqimit, marrëdhëniet e jashtme dhe ndërtimi i kapaciteteve institucionale. Ai vlerësroi se zgjedhjet e fundit janë mbajtur në përputhje me standardet europiane, por nënvizoi nevojën për përmirësimin e eficiencës së administratës publike dhe ndërtimin e një ekonomie konkurruese.
Ambasadori gjithashtu u shpreh për nevojën e përmirësimit të lirisë së shprehjes dhe mjedisit mediatik në Kosovë, duke dënuar sulmet ndaj gazetarëve dhe gjuhën fyese që shpesh përdoret nga politikanët. Ai theksoi rëndësinë e përmirësimit të kornizës ligjore për Radio Televizionin e Kosovës dhe Autoritetin e Mediave Audiovizive, për të përmirësuar parandalimin e korrupsionit.
Për sa i përket masave të BE-së kundër Kosovës, Orav njoftoi se janë ndërmarrë hapat fillestarë për heqjen e tyre, por procesi mbetet i kushtëzuar nga deeskalimi i situatës në veri dhe transferimi i pushtetit pas zgjedhjeve lokale. Ai shpresoi se së shpejti Kosova do të ketë një qeveri me të cilën mund të punojë.
