Policia e Shtetit është ngritur “në këmbë” dhe po vijon me kontrollet, kërkimet dhe shoqërimet lidhur me ngjarjen e kësaj të diele, ku në një lokal në fshatin Ndroq të Tiranës mbeti i vrarë 50-vjeçari, Alfred Dedja.
Burime për mediat bëjnë me dije se në momentin e ngjarjes viktima Alfred Dedja, i njohur me pseudonimin “Daku”, ishte i armatosur. Grupi hetimor i ka gjetur 50-vjeçarit një pistoletë, e cila u sekuestrua si provë materiale.
Lidhur me këtë ngjarje Policia e Shteti ka bërë shoqërime të shumta dhe marrje në pyetje të personave të cilët ishin dëshmitarë të kësaj ngjarje të rëndë.
Siç dhe raportuam më herët, në momentin kur dhe ndodhi vrasja viktima ishte duke darkuar me disa persona të tjerë. Autori, 27-vjeçari Julian Gjoshi u fut në lokal dhe pa thënë asnjë fjalë filloi të qëllonte 50-vjeçarin i cili u ngrit nga tavolina për ta përqafuar.
Pas të shtënave ai u largua me shpejtësi nga vendi i ngjarjes me automjetin e tij “Benz ML”, ngjyrë të zezë, ndërkohë Alfred Dedja si pasojë e plagëve të marra humbi jetën në vendin e ngjarjes.
Grupi hetimor po punon për të konfirmuar edhe një pistë zyrtare për ngjarjen, teksa dyshohet se është prishja e pazareve të drogës. Burime për mediat bëjnë me dije se viktima dhe autori ishin miq, mirëpo edhe më herët ka pasur konflikte mes tyre.
50-vjeçari Alfred Dedja jetonte mes Italisë dhe Shqipërisë, ndërsa autori në Shijak. Për këtë arsye policia ka përqëndruar kontrollet në zonën e Shijakut, Durrësit, por edhe më gjerë.
Dyshohet se autori mund të ketë pasur edhe një person ndihmës për ta larguar nga vendi i ngjarjes, ndërkohë pritet që kamerat e sigurisë të zbardhin më tepër këtë ngjarje.
