Një ngjarje e rëndë ka tronditur ditën e sotme fshatin Ndroq të Tiranës, ku një person rreth të 50-ave ka mbetur i vrarë me armë zjarri. Viktimë e kësaj ngjarjeje është shtetasi Alfred Dedja, banues në këtë fshat, i cili është qëlluar në ambientet e brendshme të një lokali në zonë.
Ende nuk dihen motivet e kësaj vrasjeje, ndërsa forca të shumta të policisë ndodhen në vendngjarje duke hetuar.
Sipas dëshmive të para, autori i dyshuar është larguar fillimisht në këmbë dhe më pas me një automjet tip “Benz” me ngjyrë të zezë. Policia ka nisur kërkimet për kapjen e tij dhe ka ngritur postblloqe në disa pika strategjike.
Në një njoftim zyrtar, policia e Tiranës deklaroi:
“Më datë 01.12.2024, rreth orës 15:30, në një lokal në Ndroq, në rrethana ende të paqarta është vrarë me armë zjarri shtetasi A. D., rreth 50 vjeç. Autori është identifikuar nga shërbimet e Policisë dhe një grup i posaçëm hetimor, në drejtimin e Prokurorisë, po vijon punën për zbardhjen e plotë rrethanave të ngjarjes, dokumentimin e plotë ligjor të saj dhe kapjen e autorit të dyshuar.”
Hetimet vazhdojnë, ndërsa ngjarja ka tronditur komunitetin lokal.
