Sulmuesi anglez Harry Kane ka pësuar një dëmtim të lehtë në muskujt e kofshës dhe do të qëndrojë jashtë fushës për një periudhë të pacaktuar, ka njoftuar klubi Bayern Munich.
Kane u detyrua të largohej nga loja pas vetëm 33 minutash gjatë barazimit 1-1 të Bayernit me Borussia Dortmundin në ndeshjen e Bundesliga-s të shtunën.
Pas ndeshjes, trajneri Vincent Kompany deklaroi se Kane nuk mendonte se dëmtimi ishte serioz dhe do t’i nënshtrohej një kontrolli për të përcaktuar shkallën e problemit.
Një përditësim në faqen zyrtare të klubit të dielën në mëngjes konfirmoi:
“Harry Kane pësoi një tendosje të lehtë muskulore në kofshën e djathtë gjatë ndeshjes së Bundesliga-s ndaj Borussia Dortmund. Ky dëmtim u konfirmua nga një skanim i kryer nga ekipi mjekësor i FC Bayern. Për këtë arsye, Bayern do të jetë pa Kane, 31 vjeç, për një periudhë të pacaktuar.”
Kane ka pasur një fillim të shkëlqyer sezoni me gjigantët gjermanë, duke shënuar 20 gola në 19 ndeshje në të gjitha garat.
Bayern Munich ka edhe pesë ndeshje të tjera përpara pushimit dimëror, duke përfshirë përballjen e Kupës së Gjermanisë ndaj Bayer Leverkusen të martën, si dhe ndeshjet e ligës ndaj Heidenheim, Mainz dhe RB Leipzig, si dhe një ndeshje në Champions League kundër Shakhtar Donetsk.
“Golat e Harry-t janë shumë të vështirë për t’u zëvendësuar, por ne e kemi thënë që nga fillimi se besojmë te skuadra jonë,” tha Kompany pas ndeshjes ndaj Dortmundit. “Nuk mund të zëvendësosh një lojtar të cilësisë së tij me një tjetër, por djemtë mund t’ia dalin së bashku.”
