Moti i keq në vend/ Vështirësi në disa segmente rrugore në Kukës, probleme me furnizimin me energjinë elektrike në disa zona në qarkun e Korçës

Reshjet e borës raportohet se janë ndërprerë në zonat e ulëta në juglindje, teksa kanë nisur reshje shiu me intesitët të ulët. Konkretisht bëhet me dije se në lartësitë mbi 1200 metra mbi nivelin e detit po vazhdojnë reshjet e borës me intesitet mesatar. • Si pasojë e motit të keq kanë mbetur pa energji dhjetra fshatra në Maliq, Devoll, Pogradec dhe Kolonjë. • Gjithashtu mësohet se në Dardhë, trashësia e borës ka shkuar në 15 centimetra dhe lëvizja e mjeteve në aksin turistik bëhet me goma dimërore. • Akset nacionale të juglindjes qarkullohen normalisht, ndërsa aksi i ri Qafë Qarri-Ersekë nuk është i kalueshëm. • Në zonat e thella malore të Korçës, Devollit, Pogradecit dhe Kolonjës trashësia e borës varion nga 20-30 centimetra. • Ditën e sotme nga qarku i Kukësit raportohet se ka prezencë të reshjeve të shiu me intensitet të ulët dhe reshje bore në lartësinë mbi 450 m. • Konkretisht, në fshatin Shishtavec mësohet se trashësia e saj shkon deri në 50 cm. • Ndërkohë, si pasojë e motit të gjitha akset nacionale rrugore vazhdojnë të jenë nën trysninë e rënies së gurëve, inerteve dhe ngricave duke krijuar vështirësi në qarkullimin normal të mjeteve në disa segmente rrugore.• Gjithashtu raportohet se në disa zona ka probleme me furnizimin me energji elektrike. • Reshjet e dëborës raportohet se janë ndërprerë në qarkun e Dibrës. Bëhet me dije se trashësia e dëborës në qytetin e Peshkopisë arriti në 15 cm ndërsa në zonat malore si Kalaja e Dodës, Sllova, Selishta dhe Lura trashësia kalon mbi 30 centimetra. • Situata rrugore është përmirësuar dhe kalimi bëhet pa probleme pa zinxhirë në akset rrugore Peshkopi-Bulqizë-Tiranë dhe Peshkopi-Kala e Dodës-Kukës, ndërsa aksi rrugor Ura e Çerenecit-Steblevë-Librazhd është i kalueshëm, me zinxhirë pjesërisht.