Detaje të reja kanë dalë në dritë lidhur me vrasjen e ndodhur në Komunën e Parisit, ku Filip Shehu, një kuzhinier, goditi me thikë kamarierin 34-vjeçar, Indrit Ismaillari. Pas ngjarjes, Shehu është arrestuar dhe aktualisht ndodhet në burg. Ai ka deklaruar para gjykatës se viktima e ka fyer dhe ngacmuar, duke shtuar se vetëm një ditë pas ngjarjes ka mësuar se Ismaillari kishte vdekur, pasi në fillim kishte menduar se kishte mbetur vetëm i plagosur.
Konflikti, sipas Shehut, kishte filluar për një situatë të papritur në vendin e punës, por ai po ashtu ka theksuar se kishte pasur marrëdhënie konfliktuale të vazhdueshme me Ismaillarin. Megjithatë, dëshmitarët dhe stafi tjetër i lokalit kanë hedhur poshtë këtë version, duke thënë se viktima kishte qenë një person i qetë që nuk kishte pasur probleme me askënd. Ismaillari kishte qenë pjesë e lokalit për rreth pesë vjet, ndërsa Shehu ishte angazhuar aty për vetëm disa muaj.
Ngjarja tragjike filloi për një diskutim mbi një pjatë me proshutë. Sipas dëshmive, kur Ismaillari e informoi Shehun se nuk mund të merrte proshutën, debati verbal përshkallëzoi deri në një akt të dhunshëm. Filip Shehu, pas përplasjes, e goditi Ismaillarin me thikë në qafë, duke prekur arterien kryesore, çka rezultoi fatal.
Pas ngjarjes, Shehu qëndroi i qetë dhe priti policinë, ndërkohë që pritet të kalojë një ekzaminim psikologjik, pasi ka raportuar probleme sociale dhe familjare. Vrasja e Indrit Ismaillarit ka trazuar komunitetin dhe është një ngjarje që ka hapur diskutime mbi marrëdhëniet mes kolegëve në ambientet e punës dhe dhunën që mund të ndodhe për shkak të mosmarrëveshjeve të vogla.
