Vendi ynë do të karakterizohet gjatë ditës së sotme nga mot i paqëndrueshëm. Reshjet e shiut do të jenë të herëpasherëshme me intensitet të ulët deri në mesditë në pjesën më të madhe të vendit dhe prej orëve të mesditës reshje shiu me intensitet deri mesatar në formë shtrëngatash. Ato do të vijojnë të jenë të herëpasherëshme në formën e shtrëngatave afatshkurta lokale deri në orët e vona të mbrëmjes, kryesisht të përqëndruara në pjesën lindore të vendit.
Në Alpe dhe relievet malore në veri-verilindje-juglindje të vendit parashikohen reshje dëbore me intensitet të ulët dhe lokalisht deri mesatar në lartësinë mbi 600-800 metra. Era do të fryjë nga kuadrati i veriut me shpejtësi mesatare 3-12 m/s, ndërsa në lugina, në relievet e larta malore dhe përgjatë vijës bregdetare hera-herës arrin shpejtësi 13-22 m/s, shoqëruar me valëzimin në dete të forcës 3-4 ballë.
Do të ketë prezencë të dendur të mjegullës në orët e mëngjesit dhe mbrëmjes dhe në momentin e reshjeve të shiut dhe dëborës. Temperaturat e ajrit pritet të jenë: në bregdet 8/14 gradë, në vendet e ulëta 4/15 dhe në vendet malore 0/8 gradë Celsius.
