Lideri i ekstremit të djathtë në Holandë, Geert Wilders, ka pretenduar se janë evidentuar “parregullsi” në zgjedhjet parlamentare, menjëherë pas shpalljes së fitores nga rivali i tij, Rob Jetten nga partia qendrore D66, me një diferencë të vogël votash. Agjencia holandeze ANP raportoi se partia e Wilders (PVV) nuk arriti ta ngushtojë diferencën me D66, pasi numërimi i votave kishte mbetur në fazën përfundimtare me disa vota ende pa u numëruar.
Wilders e shfaqi shqetësimin e tij në platformën X, ku njoftoi se mbi 100 vota nuk ishin regjistruar në Maastricht dhe sugjeroi se ngjashmëri mund të kishte ndodhur edhe në komuna të tjera. Ai gjithashtu pretendoi se 15 kuti votimi me fletë votimi kishin humbur në Zaanstad, zonë afër Amsterdamit. “Ka një ortek mesazhesh të këtij lloji nga e gjithë Holanda. Nuk e di nëse është e vërtetë, por do të ishte mirë të hetohej”, tha ai.
Në një postim tjetër, Wilders ngriti shqetësime lidhur me pronarin e kompanisë HackDefense, e cila ishte angazhuar për të testuar softuerin e numërimit të votave, duke aluduar se ai ishte anëtar i partisë D66. Wilders pyeti nëse ky informacion ishte i saktë. Kompania HackDefense kishte testuar softuerin në zgjedhjet e vitit 2021 dhe 2023, të cilat atëherë PVV i kishte fituar. Megjithatë, për zgjedhjet e ardhshme evropiane dhe për ato parlamentare, Komisioni Zgjedhor ka ndërruar kompaninë për testimin e softuerit.
Derisa votat nga disa zona zgjedhore dhe ata holandezë që jetojnë jashtë vendit ende duhet të numërohen, D66 vazhdon të udhëheqë me një diferencë shumë të vogël prej 15,155 votash mbi PVV. Rezultatet përfundimtare zyrtare priten të shpallen të premten e ardhshme, duke rritur tensionet politike mes dy partive.
