Kostoja vjetore prej rreth 200 milionë eurosh është rezultat i vendimeve të Qeverisë në detyrë për rritjen e pensioneve, shtesave për fëmijë dhe pagës së 13-të për punonjësit në sektorin publik. Gjatë mbledhjes të së premtes, qeveria vendosi që pensioni minimal të rritet nga 120 euro në 150 euro që nga nëntori i këtij viti. Një tjetër ndryshim është rritja e shtesave për fëmijë për 50 për qind, duke prekur rreth 400 mijë fëmijë të moshës deri në 16 vjeçare.
Kryeministri në detyrë, Albin Kurti, theksoi rëndësinë e këtyre vendimeve gjatë një seance në Kuvend, e cila dështoi për t’i siguruar votat për një mandat të ri. Ai shpjegoi se rritja e pensioneve do të ndikojë tek 200 mijë persona mbi 65 vjeç, me një kosto prej rreth 72 milionë euro në vit. Po ashtu, vendimi për rritjen e shtesave për fëmijë do të ketë një kosto mujore prej rreth 50 milionë eurosh. Megjithatë, këto shpenzime nuk ishin parashikuar në buxhetin për vitin 2025, dhe deri tani nuk është sqaruar se nga do të sigurohen këto fonde.
Shtesat e reja do të përfshihen në Projektbuxhetin për vitin 2026. Për herë të parë, qeveria po ashtu parashikon dhënien e rrogës së 13-të për të gjithë punonjësit publike, me një kosto shtesë prej më shumë se 53 milionë eurove. Në mbledhjen e së premtes, u miratua gjithashtu rritja e pagës minimale për rreth 150 mijë punëtorë në sektorin privat, nga 350 euro në 425 euro në janar të vitit të ardhshëm dhe më pas në 500 euro në korrik.
Përveç këtyre masave, Qeveria planifikon të implementojë programin “SuperPuna për Gratë”, që synon të mbulojë pagën minimale për gjashtë muaj për bizneset që punësojnë gra. Këto vendime shtojnë presionin mbi buxhetin e shtetit dhe kanë ngjallur diskutime lidhur me qëndrueshmërinë financiare afatgjatë.
