Presidenti turk, Recep Tayyip Erdogan, ka kritikuar ashpër Gjermaninë për atë që e quajti “mosreagim ndaj gjenocidit të Izraelit” dhe sulmeve të tij ndaj Gazës.
Gjatë një konference të përbashkët për shtyp me kancelarin gjerman, Friedrich Merz, në Ankara, Erdogan tha se Izraeli ka qasje në armë bërthamore dhe armë të tjera të ndaluara, të cilat po i përdor për të kërcënuar Gazën, ndërsa “Hamasi nuk është i pajisur në të njëjtën mënyrë”.
“Duhet t’i japim fund gjenocidit dhe urisë së qëllimshme duke përfshirë Kryqin e Kuq gjerman dhe Gjysmëhënën e Kuqe turke. A nuk i sheh këto Gjermania? Është detyrë humanitare e jona, e Gjermanisë dhe e vendeve të tjera që t’i japim fund urisë dhe masakrave në Gaza”, deklaroi Erdogan.
“Ata jo vetëm që po sulmojnë Gazën, por gjithmonë kanë qenë të vendosur ta nënshtrojnë Gazën përmes urisë dhe gjenocidit, dhe kjo është ende duke vazhduar”, tha Erdogan.
Deklarata e Erdogan erdhi në përgjigje të kancelarit gjerman, Merz, i cili i tha një gazetari turk se Izraeli ishte bërë një strehë për miliona hebrenj, duke përfshirë shumë prej tyre që i mbijetuan Holokaustit.
“Kjo është arsyeja pse Gjermania do të qëndrojë gjithmonë në krah të Shtetit të Izraelit”, tha Merz.
Kancelari gjerman shtoi se Izraeli kishte ushtruar “të drejtën e tij për vetëmbrojtje” pas sulmit të udhëhequr nga Hamasi më 7 tetor 2023 – duke thënë se lufta shkatërruese mund të ishte shmangur nëse Hamasi do të kishte liruar pengjet më herët dhe do të kishte dorëzuar armët.
“Atëherë kjo luftë do të kishte mbaruar menjëherë”, theksoi Merz.
Erdogan u përgjigj se nuk ishte dakord me Merz, duke argumentuar se Hamasi nuk kishte armë bërthamore ose armë të rënda, ndërsa Izraeli zotëronte armë të tilla dhe kishte bombarduar sërish Gazën pavarësisht armëpushimit të rënë dakord dy javë më parë.
Erdogan theksoi se, njësoj si për përpjekjet për t’i dhënë fund luftës Rusi–Ukrainë, edhe për Gazën “Turqia dhe Gjermania janë dy vende kyçe që mund të bashkojnë forcat për paqen”.
Pavarësisht armëpushimit të brishtë të ndërmjetësuar nga SHBA-të që hyri në fuqi më 10 tetor, Izraeli kreu disa bombardime mbi Gazë pas vrasjes së një ushtari izraelit në Rafah të martën. Sipas Ministrisë së Shëndetësisë në Gaza, sulmet hakmarrëse të Izraelit lanë 104 të vrarë, shumica gra e fëmijë.
Gazetari i Al Jazeera-s, Hani Mahmoud, raportoi nga Gaza se bombardimet e kësaj jave ishin “të ngjashme me javët e para të gjenocidit për nga intensiteti dhe shkalla e shkatërrimit”.
Izraeli deklaroi të mërkurën se kishte filluar “zbatimin e armëpushimit”, ndërsa presidenti amerikan Donald Trump tha se “armëpushimi nuk është në rrezik”, pavarësisht sulmeve të fundit. Ndërkohë, Katari, ndërmjetës në marrëveshje, i quajti shkeljet izraelite “zhgënjyese dhe irrituese”.
Në kuadër të planit 20-pikësh të Trump për t’i dhënë fund luftës në Gaza, parashikohet krijimi i një force ndërkombëtare për të monitoruar armëpushimin, por ende nuk është përcaktuar se cilat vende do të dërgojnë trupa. Izraeli ka deklaruar se kundërshton përfshirjen e forcave turke për shkak të deklaratave të mëparshme të Erdogan ndaj Izraelit.
“Vendet që duan të dërgojnë trupa duhet të jenë të paktën të ndershme ndaj Izraelit”, tha ministri i Jashtëm izraelit, Gideon Saar.
Që nga tetori 2023, lufta në Gaza ka shkaktuar të paktën 68 mijë e 527 të vrarë dhe 170 mijë e 395 të plagosur, sipas autoriteteve palestineze. Në sulmet e Hamasit më 7 tetor 2023 u vranë 1 mijë e 139 persona në Izrael, ndërsa rreth 200 të tjerë u morën peng.
