Hetimi i Prokurorisë së Milanos për rrjetin klandestin të basteve ka hyrë në një fazë të re, pasi disa futbollistë të njohur kanë shfrytëzuar mundësinë për të paguar një gjobë prej 250 eurosh për të shmangur ndjekjen penale. Kërkesat e para për këtë “obligim” janë dorëzuar nga futbollistët Samuele Ricci, Raoul Bellanova dhe Mattia Perin. Pritet që prokurorët të miratojnë këto kërkesa, duke përfunduar procedurat ndaj këtyre lojtarëve pas pagesës së simbolike.
Hetimi, që drejtohet nga Guardia di Finanza dhe është koordinuar nga prokurorët Roberta Amadeo dhe Paolo Filippini, ka identifikuar gjithsej 13 futbollistë të përfshirë në bastet ilegale, veçanërisht në poker online dhe ngjarje sportive jashtë futbollit. Disa nga emrat e njohur përfshijnë Nicolò Fagioli, Nicolò Zaniolo, Sandro Tonali, Alessandro Florenzi dhe Weston McKennie. Shumica e tyre janë akuzuar për pjesëmarrje në baste të paligjshme, ndërsa Fagioli dhe Tonali akuzohen gjithashtu për promovimin e platformave të paligjshme. Këta të fundit nuk kanë mundësi të përfitojnë nga opsioni i “obligimit” dhe pritet të kërkojnë marrëveshje për pranimin e fajësisë.
Përveç futbollistëve, edhe sportistë nga disciplina të tjera, si tenisti Matteo Gigante, pritet të përfitojnë nga mundësia e pagesës së gjobës për të mbyllur çështjen. Fokusi i hetimit është gjithashtu mbi dy “menaxherët” e dyshuar të rrjetit, Tommaso De Giacomo dhe Patrik Frizzera, si dhe tri persona të tjerë që dyshohet se kanë falsifikuar shitje të orëve luksoze për të mbuluar borxhet e lojtarëve nga baste. Një seancë dëgjimore për pranimin e fajësisë për këta pesë persona është planifikuar për më 26 nëntor.
Ky skandal i bastetve ka shokuar botën e sportit në Itali dhe ka tërhequr vëmendjen e mediave, duke nxitur thirrje për masa më të ashpra ndaj fenomeneve të tilla në botën e sportit.
