Sekretari amerikan i Thesarit, Scott Bessent, ka deklaruar se gjatë takimit mes presidentit të SHBA-së Donald Trump dhe atij të Kinës Xi Jinping, të dy udhëheqësit patën mundësinë të diskutojnë “ide për pamjen e madhe” të marrëdhënieve mes dy vendeve. Ai shtoi se nënshkrimi i marrëveshjes mund të ndodhë që javën e ardhshme.
Në një intervistë për Fox Business, Bessent tha se javën e kaluar janë zhvilluar bisedime shumë intensive dyditore në Kuala Lumpur me delegacionin kinez, ku është arritur progres i rëndësishëm për disa çështje ekonomike dhe tregtare.
Sipas tij, palët kanë rënë dakord për shtyrjen me një vit të kufizimeve të Kinës mbi eksportin e elementëve të rrallë tokësorë, si dhe për fillimin e bashkëpunimit për frenimin e krizës së fentanilit që ka goditur SHBA-në. Në këmbim, Uashingtoni ka rënë dakord të ulë tarifat ndaj Kinës nga 20% në 10% për produktet e ndërlidhura me këtë çështje.
Bessent shtoi se marrëveshja përfshin edhe pezullimin e disa sanksioneve ndaj kompanive kineze dhe hetimeve për industrinë e ndërtimit të anijeve për një periudhë njëvjeçare. Ai theksoi se vetëm kërcënimi i këtyre hetimeve ka ndikuar në rënien e porosive për kantierët detarë kinezë.
Në lidhje me aplikacionin TikTok, Bessent bëri të ditur se janë “shumë afër përfundimit të një marrëveshjeje”, e cila mund të përmbyllet në javët apo muajt e ardhshëm.
Një tjetër pjesë e rëndësishme e marrëveshjes lidhet me blerjet bujqësore: Kina ka pranuar të blejë 12 milionë ton sojë këtë sezon dhe të garantojë blerjen e të paktën 25 milionë tonëve në vit gjatë tre viteve të ardhshme.
“Vizita e Trump në Azi mund të sjellë 2 trilionë dollarë investime”
Sipas Bessent, turneu aziatik i presidentit Trump pritet të sjellë rreth 2 trilionë dollarë investime të reja në SHBA. Megjithatë, ai kritikoi mbylljen e qeverisë amerikane për shkak të ngërçit politik me Demokratët, duke e cilësuar atë si “një turp global” që po dëmton ngadalë ekonominë e vendit.
Ai shtoi se tarifat doganore kanë ndihmuar në uljen e deficitit buxhetor dhe i kanë dhënë presidentit Trump një avantazh të fortë në negociata ndërkombëtare.
Kërkimi për drejtuesin e ri të Fed-it
Bessent njoftoi gjithashtu se po zhvillohen rundët e dytë të bisedimeve për përzgjedhjen e guvernatorit të ardhshëm të Rezervës Federale (Fed) dhe se lista e kandidatëve do t’i dorëzohet presidentit në fillim të dhjetorit. Ai parashikoi që deri në Krishtlindje, SHBA të ketë një emër të konfirmuar për drejtimin e bankës qendrore.
Duke vlerësuar vendimin e fundit të Fed-it për uljen e normës bazë të interesit me 0.25 pikë përqindje, Bessent tha se gjuha e përdorur në deklaratë tregon se institucioni është ende “i mbërthyer në të kaluarën” dhe ka nevojë për “një lider që do ta rinovojë plotësisht”.
Në fund, ai u shpreh optimist për vitin 2026, duke parashikuar një periudhë me rritje të lartë ekonomike dhe inflacion të ulët, ngjashëm me vitet e para të presidencës së Trump.
“Ne po shohim rritje të produktivitetit, rikthim të fuqishëm të punësimit dhe një valë të re investimesh që do të forcojnë ekonominë amerikane,” – përfundoi Bessent.
