Një sërë sulmesh ajrore të kryera nga forcat amerikane kundër anijeve të dyshuara për trafik droge në Oqeanin Paqësor lindor kanë rezultuar me vrasjen e 14 personave të dyshuar si trafikantë ndërsa vetëm një shpëtoi, njoftoi të martën Sekretari i Mbrojtjes i SHBA-së, Pete Hegseth. Ky ishte veprimi më i fundit në kuadër të fushatës kundër narkotikëve të nisur nga Presidenti i SHBA, Donald Trump.
Operacionet në Paqësor zhvillohen paralelisht me një përqendrim të madh ushtarak amerikan në Karaibe, ku janë vendosur shkatërrues me raketa të telekomanduara, avionë luftarakë F-35, një nëndetëse me energji bërthamore dhe mijëra ushtarë.
Po ashtu, administrata ka urdhëruar grupin e sulmit të aeroplanmbajtëses USS Ford të zhvendoset në rajon, dhe pritet që ajo të mbërrijë në Karaibe gjatë javëve të ardhshme.
Në një deklaratë të shpërndarë në rrjetet sociale, Hegseth bëri të ditur se autoritetet meksikane janë angazhuar në operacionin e kërkim-shpëtimit për personin e vetëm që mbijetoi nga tre sulmet.
“Katër anijet ishin identifikuar më herët nga inteligjenca jonë, duke lundruar përgjatë rrugëve të njohura të trafikut të drogës dhe duke transportuar substanca narkotike.”-theksoi ai.
