Pas muajsh spekulimesh në lidhje me jetën e tij sentimentale, tenisti italian Jannik Sinner vendosi të zyrtarizojë lidhjen e tij me modelen daneze Laila Hasanovic gjatë fjalimit pas fitores në Turneun e Vjenës. Me një frazë të thjeshtë, ai prezantoi për herë të parë partneren e tij para publikun: “Falenderoj skuadrën time për mbështetjen edhe në momente të vështira. E di që nuk është e lehtë. Këtu është edhe familja ime, e dashura ime…”. Kjo deklaratë solli një reagim të menjëhershëm nga media dhe adhuruesit e tenisit në të gjithë botën.
Laila Hasanovic, e lindur në Kopenhagen në nëntor të vitit 2000, ka arritur të bëhet figura e njohur në botën e modës, duke bashkëpunuar me emra të njohur si Armani Beauty dhe Prada Beauty. Ajo ka një ndjekje të konsiderueshme në Instagram, me mbi 350 mijë ndjekës, ku ndan imazhe nga karriera e saj si modele, si dhe nga momentet e saj më personale.
Para se të fillonte lidhjen me Sinner, Hasanovic bënte tituj për një marrëdhënie me Mick Schumacher, djalin e legjendës së Formula 1, Michael Schumacher; një lidhje që kishte zgjatur rreth një vit dhe përfundoi përpara verës së vitit 2024. Zërat për lidhjen e re mes Sinner dhe Hasanovic kishin filluar që në pranverë të këtij viti. Ajo kishte qenë e pranishme në disa ndeshje të Jannik në turne të tilla si Wimbledon dhe Roland Garros, por çifti kishte vendosur të mbante një profil të ulët derisa Sinner e zyrtarizoi marrëdhënien e tyre në Vjenë.
Pra, Sinner dhe Hasanovic nuk janë vetëm një çift i ri, por janë gjithashtu një kombinim i suksesit në dy fusha të ndryshme: sport dhe modë. Me këtë njohje të re, ata premtojnë të jenë një nga çiftet më të ndjekura dhe të komentuar në mediat sociale dhe atë sportive.
