Një ndjekje spektakolare në një autostradë të Los Anxhelosit përfundoi me skenë dramatike, kur një automjet, që drejtohej nga një polic jashtë shërbimit, përplasi një motorist, i cili pak më herët kishte vrarë një koleg të tij.
Sipas mediave lokale, përplasja ndodhi ndërsa motori lëvizte me shpejtësi deri në 270 km/orë. Pamjet e transmetuara nga televizioni tregojnë se momenti i përplasjes ndodhi kur motoristi kishte lëshuar timonin për të rregulluar një çantë që mbante me vete.
Si pasojë e goditjes, ai u hodh në ajër dhe u rrëzua me shpinë në asfalt, duke shpëtuar për pak që motori të mos i binte mbi kokë.
Më vonë u bë e ditur se automjeti që e përplasi drejtohej nga një polic i Drejtorisë së Antidrogës, i cili, sipas autoriteteve, po kryente një “ndërhyrje të ligjshme”.
Ndjekja kishte nisur të hënën, pasi policia kishte marrë informacion për një burrë që kërcënonte një grua me armë. Kur oficerët mbërritën në vendngjarje, agresori qëlloi me armë duke plagosur për vdekje ndihmës-sherifin Andrew Núñez, i cili u godit me plumb në kokë.
Sipas njoftimit zyrtar, Núñez kishte gjashtë vite shërbim në polici dhe lë pas bashkëshorten shtatzënë me fëmijën e tyre të dytë, një vajzë 2-vjeçare, nënën dhe katër vëllezër.
