Gëzimi pas fitores në “El Clásico” nuk zgjati shumë për Real Madridin. Klubi madrilen ka konfirmuar zyrtarisht se Dani Carvajal do të mungojë për 6 deri në 10 javë, pasi do t’i nënshtrohet një artroskopie për shkak të një problemi në gjurin e djathtë.
Në njoftimin zyrtar thuhet:
“Pas kontrolleve mjekësore të kryera nga shërbimi mjekësor i klubit, Dani Carvajal është diagnostikuar me praninë e një fragmenti të lirë artikular në gjurin e djathtë. Lojtari do t’i nënshtrohet ndërhyrjes artroskopike.”
Mbrojtësi e ndjeu shqetësimin pas përfundimit të “El Clásico”-s dhe iu nënshtrua menjëherë testeve mjekësore, të cilat zbuluan nevojën për operacion. Situata ka shkaktuar shqetësim në klub, pasi bëhet fjalë për të njëjtin gju që e mbajti atë jashtë për nëntë muaj pas një dëmtimi të rëndë në tetor të vitit të kaluar.
Ky është një tjetër goditje për Xabi Alonson, që sapo kishte rikuperuar të dy mbrojtësit e krahut. Me Carvajal jashtë, Trent Alexander-Arnold mbetet i vetmi mbrojtës i mirëfilltë në krahun e djathtë, edhe pse edhe ai sapo është rikthyer nga një dëmtim dhe nuk është ende në formë optimale. Në javët e ardhshme, pritet që Valverde të ndihmojë në atë pozicion për ta mbuluar mungesën.
