Një shpërthim i fuqishëm ka ndodhur mbrëmjen e djeshme në Campo Ascolano, një qytet në jug të Romës, ku një pajisje shpërthyese ishte vendosur nën makinën e gazetarit dhe prezantuesit të emisionit investigativ “Report”, Sigfrido Ranucci. Ngjarja ndodhi rreth orës 22:00 dhe shkaktoi dëme të mëdha materiale, përfshirë makinën e Ranuccit, një tjetër automjet të familjes dhe fasadën e shtëpisë së tij. Megjithatë, për fat të mirë, nuk kishte të lënduar.
Sipas deklaratës nga programi “Report”, shpërthimi ishte kaq i fuqishëm sa mund të kishte shkaktuar pasoja fatale për ata që ndodhen në afërsi. Pas shpërthimit, Ranucci tregoi për gazetën Corriere della Sera se vajza e tij kishte parkuar automjetin vetëm 20 minuta përpara incidentit. Ai shprehu tronditje dhe tha: “Ata mund ta kishin vrarë…”. Ai gjithashtu nuk e përjashtoi mundësinë e lidhjes së këtij sulmi me hetimet e reja që programi i tij kishte njoftuar publikisht disa ditë më parë.
Forcat e Karabinierëve, zjarrfikësit dhe ekipi i hetimeve mjeko-ligjore shkuan menjëherë në vendin e ngjarjes. Zyra e Prokurorit lokal ka nisur një hetim për rastin dhe është informuar edhe Prefekti i zonës. Ranucci deklaroi se paraprakisht dyshohet të jetë përdorur të paktën një kilogram eksploziv.
Ky incident ka shkaktuar reagime të forta në Itali dhe më gjerë, duke rikthyer në vëmendje rreziqet me të cilat përballen gazetarët investigativë gjatë punës së tyre. Gazetari dhe emisioni “Report” janë të njohur për hetimet e tyre të thella mbi fenomene të ndryshme sociale dhe kriminale, gjë që i bën ata në shënjestër të sulmeve dhe kërcënimeve.
Ky ngjarje ngre shqetësime të mëdha mbi sigurinë e gazetarëve dhe lirinë e mediave në Itali, një vend ku raportimi investigativ shpesh përballet me presione të ndryshme.
