Ish-kryebashkiaku i Durrësit Vangjush Dako, është dënuar me 2 vite e 8 muaj burg nga Gjykata Kundër Korrupsionit dhe Krimit të Oragnizuar.
Pas këtij vendimi, ka reaguar Lulzim Basha, i cili në rrjetin e tij social ka postuar një foto të Dakos me Edi Ramën duke thënë se ai është një nga “hajdutët më të dobishëm” të kryeministrit, përmes të cilit ky i fundit e ktheu Bashkinë e Durrësit në një vatër korrupsioni.
Ndër të tjera ish-kreu i demokratëve thotë se shpallja “non-grata” e Dakos nga SHBA dhe vendimi i i kësaj të hëne nga GJKKO ndaj tij, janë tregues të “degradimit të pushtetit të Edi Ramës, i cili ka përdorur Dakon për vjedhjen e zgjedhjeve dhe shkatërrimin e Durrësit, e po ashtu ka qenë një nga mbrojtësit më të ethshëm të ish-kryebashkiakut, duke i krijuar ndër vite një imunitet të paligjshëm”.
Sipas Bashës vendimi i sotëm i GJKKO është një hap pozitiv, mirëpo jo i mjaftueshëm pasi sipas tij ish-kryebashkiaku duhet të hetohet për lidhjet e tij me krimin.
Postimi i plotë:
Vangjush Dako është një nga hajdutët e dobishëm të Edi Ramës, përmes të cilit e ktheu Bashkinë e Durrësit në një vatër korrupsioni, në shërbim të interesave ekonomike dhe elektorale të pushtetit dhe krimit të organizuar.
Sanksionimi i tij si “non grata” nga Shtetet e Bashkuara të Amerikës dhe dënimi nga GJKKO, janë tregues të degradimit të pushtetit të Edi Ramës, i cili ka përdorur Dakon për vjedhjen e zgjedhjeve dhe shkatërrimin e Durrësit, e po ashtu ka qenë një nga mbrojtësit më të ethshëm të ish-kryebashkiakut, duke i krijuar ndër vite një imunitet të paligjshëm.
Vendimi i sotëm i GJKKO është një hap i parë pozitiv, por i pamjaftueshëm. Vangjush Dako duhet të hetohet për lidhjet e tij me krimin dhe përdorimin e pushtetit në funksion të organizatave kriminale në këmbim të votave.
E gjithë bota e ka dëgjuar përmes BILD se si Dako bashkëpunonte me krimin e organizuar për të përfituar vota në Durrës. Dosja famëkeqe 339 nuk mund të harrohet, por duhet t’i shkohet deri në fund hetimeve.
Ndarja e politikës nga krimi dhe lufta kundër korrupsionit janë kusht për zgjedhje të lira dhe të ndershme dhe për një qeveri që i shërben qytetarëve.
Shqipëria meriton më shumë!/ilirianews
