Leonard Nikolli, 61 vjeç, është shoqëruar sot në ambientet e Komisariatit nr. 3 në Tiranë, pas një incidenti të rëndë të ndodhur në zyrat e Inspektoratit të Mbrojtjes së Territorit (IMT). Sipas burimeve zyrtare, Nikolli ka hyrë në ambientet e institucionit duke kërcënuar me jetë drejtuesin Klajdi Meçi, me pretendimin se ishte i armatosur.
Dëshmitarë dhe burime policore bëjnë me dije se sapo ka hyrë në zyrat e IMT-së, Nikolli është shprehur: “Jam i armatosur, ku është drejtori se do e vras?”, ndërsa më pas ka kërcënuar se do ta trajtonte njësoj si gjyqtarin Astrit Kalaja.
Kallëzimi në polici është bërë nga vetë drejtori Klajdi Meçi, i cili ka deklaruar se është ndjerë i rrezikuar për jetën dhe ka pretenduar se Nikolli mbante armë.
Në deklarimet e tij paraprake përpara hetuesve, Leonard Nikolli ka pohuar se ka pasur probleme të vazhdueshme me pronat dhe se për këtë bënte përgjegjës IMT-në e Tiranës. Sipas Meçit, Nikolli kishte ankesa për një ndërtim që sipas tij duhej të prishej por IMT Tiranë nuk e kishte prishur. Objekti në fjalë ka sigurim padie me vendim gjykate, që e ndalon ndërhyrjen e IMT-së, pavarësisht se mund të ketë pretendime nga palë të tjera të përfshira.
Policia ka nisur hetimet për zbardhjen e plotë të rrethanave të ngjarjes, ndërsa 61-vjeçari pritet të arrestohet me akuzën e kanosjes dhe kërcënimit për jetën të një zyrtari shtetëror
