Kreu i SPAK, Altin Dumani, ka sqaruar në Komisionin e Ligjeve arsyet e vonesës së operacionit “Ura”, pas akuzave të ngritura nga opozita se aksioni dështoi dhe personat kryesorë u larguan para arrestimit.
Deputeti i PD-së, Oerd Bylykbashi, pyeti Dumanin përse operacioni u zhvillua pas zgjedhjeve dhe pse disa nga të dyshuarit arritën të iknin, duke lënë të kuptohej se kishte patur dekonspirim të hetimit.
“Pse u vonua aq shumë operacioni Ura, i cili nëse do kishte patur ndërhyre 10 ditë para zgjedhje jo 10 ditë pas, rezultati në Durrës do ishte tjetër. Patët 52 masa sigurie dhe numër i kufizuar u arrestua. Më kryesorët ikën, dikush i njoftoi përpara. A keni dijeni pse u vonua. Nëse dikush e dekonspiroi”, tha Bylykbashi.
Në përgjigje, Dumani tha se SPAK e kishte kërkuar caktimin e masave që në muajin mars, por vendimi i gjykatës u dha në maj, dy muaj më vonë.
“Operacioni ‘Ura’ është depozituar nga SPAK për caktim mase që në mars 2025. Vendimi për masën është dhënë më 5 maj dhe të njëjtën ditë është komunikuar me kolegët e Barit. U koordinuam për takimin në Shqipëri më 7 maj, dhe pas përgatitjeve u caktua data 21 maj për zbatimin e operacionit,” – tha Dumani.
Ai theksoi se SPAK nuk ka përgjegjësi për ekzekutimin e urdhrave të arrestit.
“Pse u arrestuan apo jo, nuk është detyra jonë të arrestojmë njerëz. Nuk mund të na kërkohet kjo përgjegjësi neve,” – shtoi ai.
