Familja e Gjovalin Shkambit ka bërë një reagim, në lidhje me deklaratën e tij të fundit ku kërcënoi publikisht drejtësinë dhe gjyqtarët që do t’i dënonin nipin.
Në deklaratën e tij të fundit, Gjovalin Shkambi tha se cilido gjyqtarë që do të dënonte nipin e tij, Elvis Shkami, i cili është autori i vrasjes së gjykatësit Astrit Kalaja, do të përballej me plumba nga ai.
Përmes këtij reagimi, fëmijët e Gjovalin Shkambit kanë kërkuar mirëkuptim, duke thënë se deklaratat e tij janë marrë në momente të rënduara emocionale dhe psikologjike.
Ata i kanë kërkuar mediave të shmangin sa më shumë përfshirjen në jetën e tyre private, ndonëse janë në dijeni të rëndësisë publike që ka kjo ngjarje. Në fund ata kanë uruar që drejtësia të mbizotëeroj në trajtimin e këtij rasti.
Mesazhi i familjes së Gjovalin Shkambit
E nisim këtë mesazh duke shprehur ngushëllimet më të sinqerta ndaj familjes së gjyqtarit të ndjerë! Shprehim keqardhje të thellë për gjithë situatën e krijuar pas deklaratave të babait tonë.
Kërkojmë publikisht ndjesë për fjalët e thëna prej tij, të cilat, siç ka pranuar edhe vetë, janë shprehur në një moment gjaknxehtësie dhe tronditjeje të madhe. Pavarësisht se drejtësia deri më tani nuk ka arritur ende të vendosë pikën përfundimtare mbi këtë çështje, ne nuk duam në asnjë mënyrë të përdorim gjuhë urrejtjeje ndaj personave që ushtrojnë detyrën e tyre dhe respektojmë proceset ligjore që po zhvillohen.
Jemi plotësisht të vetëdijshëm se kërcënimet nuk mund të justifikohen në asnjë rrethanë, por kërkojmë mirëkuptim për gjendjen e rënduar emocionale dhe psikologjike në të cilën ndodhej babai ynë në ato momente. Ne si familjarë e kuptojmë plotësisht madhësinë dhe ndjeshmërinë e kësaj ngjarjeje, por kërkojmë me mirëkuptim që mediat të shmangin sa më shumë përfshirjen në jetën tonë familjare, pasi babai jone është marrë në pyetje dhe është publikuar në momente jashtëzakonisht të vështira dhe në gjendje të rënduar psikologjike. Urojmë që drejtësia dhe qetësia të mbizotërojnë, dhe Zoti të bëjë atë që është më e mira për të gjithë!
Me respekt, Familja e Gjovalin Shkambi
Si ndodhi ngjarja e rëndë ?
Ngjarja ndodhi pas përfundimit të një seance gjyqësore për një çështje pronësie në Shkodër, e cila ishte në shqyrtim në Apelin e Tiranës. Mësohet se gjyqtari Astrit Kalaja kishte dhënë vendimin kundër palës së përfaqësuar nga Elvis dhe Gjon Shkambi. Menjëherë pas shpalljes së vendimit, Elvis Shkambi ka nxjerrë armën dhe ka qëlluar tre herë në drejtim të gjyqtarit, duke e goditur në gjoks dhe lënë të vdekur në vend. Gjatë të njëjtës ngjarje, janë plagosur edhe babë e bir, Rakip dhe Ervis Kurtaj, pala tjetër në proces, të cilët ndodhen aktualisht në Spitalin e Traumës dhe janë jashtë rrezikut për jetën.
