Policia e Tiranës ka ndaluar punonjësin e sigurisë në Gjykatën e Përgjithshme të Apelit, pas vrasjes në sallën e gjyqit të gjyqtarit Astrit Kalaja.
Lajmi konfirmohet nga burime për mediat, teksa ende nuk dihet identiteti i tij. Ai konsiderohet si përgjegjës për skanerin e sigurisë në hyrjen e institucionit të drejtësisë.
Ende nuk dihen detajet se si 30-vjeçari Elvis Shkambi ka arritur që të fusë armën e zjarrit pistoletë brenda në sallë, teksa ai qëlloi me tre plumba gjyqtaritn Kalaja, pas vendimit të Apelit kundër tij, për një çështje pronësie. Të plagosur mbetën edhe dy persona të tjerë që ishin palë kundërshtare në gjyq me autorin.
