Personi që shikoni në fotografi është Gjon Shkëmbi, i arrestuar këtë të hënë si autor i vrasjes së gjyqtarit Astrit Kalaja. Ai është futur në sallën e gjyqit, në Gjykatën e Apelit, me armë zjarri dhe ka qëlluar disa herë në drejtim të Astrit Kalasë dhe dy personave të tjerë.
Fatkeqësisht, nga plumbat, gjyqtari Astrit Kalaja ka humbur jetën në duart e mjekëve në Spitalin e Traumës dhe të plagosur kanë mbetur dhe dy persona të tjerë, të cilët janë babë e bir. Këta dy shtetas ishin në proces gjyqësor me Gjon Shkëmbin.
Autori Gjon Shkëmbi është shoqëruar aktualisht në ambientet e Komisariatit nr.1 në kryeqytet, i cili është shumë pranë vendit të ngjarjes. Ndërkohë, një grup hetimor, forca të shumta Policie dhe prokurori i gatshëm janë në zonën e bulevardit.
Dinamika e ngjarjes është e paqartë, pasi nuk dihet se si autori ka mundur të depërtojë me armë brenda në ambientet e gjykatës, pasi në hyrje të saj ka një detektor metalik.
