Adrola Dushi, modelja e njohur shqiptare, ka qenë e ftuar në podcastin e Orinda Hutës, ku ka ndarë rrëfime të sinqerta nga jeta personale dhe profesionale. Ajo zbuloi për herë të parë detaje mbi shtatzëninë me djalin e saj, Troi, që është fryt i lidhjes me Adis Patushin. Me humor, Adrola tregoi se në momentin që mori vesh se ishte shtatzënë, kishte menduar për abort, pasi ishte shumë e re dhe në kulmin e karrierës si modele.
Një pjesë e rëndësishme e bisedës ishte kujdesi pas lindjes. Adrola ndau një sekret për nënat që shqetësohen nga ndryshimet trupore: ajo përdori një korsetë të gomuar që nga dita e tretë pas lindjes, për dy muaj rresht, për të parandaluar varjen e lëkurës dhe për të ruajtur formën e trupit.
“Vura korsetën ditën e tretë pas lindjes dhe e mbajta gjatë gjithë ditës, përveç kur bëja dush. Ndihmoi shumë për të humbur peshë dhe barku im u kthye si të mos kisha lindur kurrë,” rrëfeu ajo, duke theksuar efektet pozitive të kësaj metode.
Në rrëfimin e saj, Adrola foli edhe për balancën mes nënësisë dhe karrierës, duke treguar vështirësitë që hasin gratë në industrinë e modës. Ajo theksoi rëndësinë e përkushtimit, ndjeshmërisë si nënë dhe ruajtjes së profesionalizmit në një botë konkurruese.
