Gjykata e Posaçme ka lënë në fuqi masat për 5 të arrestuarit gjatë operacionit të zhvilluar dy ditë më parë në Durrës. Grupi kriminal vepronte në zonën e Gjirit të Lalëzit dhe ishte i përfshirë në vrasje me pagesë dhe tjetërsim të pronave përmes falsifikimit të dokumenteve.
Të arrestuarit janë:
Vullnet Muça, vëllai i Aleksandër Lahos (Rrumi i Shijakut) – arrest në burg
Enea Kume, vëllai i deputetit Loer Kume – arrest në burg
Vlash Brahja – arrest në burg
Astrit Avdylaj alias Astrit Balliu – arrest në burg, i paraburgosur edhe për operacionin “Revanshi”
Edlira Avdylaj – ndalim i daljes jashtë shtetit
Hetimi i SPAK nxori në sipërfaqe emrat e Astrit Avdylajt dhe Aleksandër Lahos, të dyshuar si drejtues të grupeve kriminale të përfshira në vrasje dhe tjetërsim pronash në bregdet. Për ta janë lëshuar urdhër-arreste, por vetëm Avdylaj është ndaluar, ndërsa Lahos vijon të jetë në kërkim.
Në total, SPAK siguroi 9 masa sigurie, 8 prej të cilave “arrest në burg”. Në kërkim përfunduan edhe: Aleksandër Laho, Aldo Avdylaj, Agron Bejdolli dhe Alfred Doka.
Sipas SPAK, grupi i Avdylajt është përgjegjës për vrasjen e Edmir Bregut (i njohur si Ilir Kuçi ose Maloku) në janar 2021, një hakmarrje pas tentativës për të vrarë nipin e Avdylajt, Aldo Avdylajn. Në ekzekutim morën pjesë:
Koordinues: Aldo Avdylaj
Ndihmës: Enea Kume
Ekzekutor: Alfred Doka
Aleksandër Laho, sipas SPAK, drejtonte një grup kriminal të përfshirë në falsifikime pronësie, me qëllim zhvatjen e pronave nga Gjiri i Lalëzit tek Kepi i Rodonit.
