Këshilli i Ministrave ka njoftuar Presidencën për vakancën e krijuar në bashkinë e Tiranës pas shkarkimit të Erion Veliaj, edhe pse Veliaj ditën e djeshme (29 shtator) ankimoi vendimin në Gjykatën Kushtetuese.
Në shkresën që mban datën 30 shtator, Presidenca është njoftuar edhe për vakancën e krijuar në 5 bashkitë e tjera të vendit, Vlorë, Tepelenë, Berat, Mat dhe Cerrik.
Presidenti Bajram Begaj ka 48 orë kohë për të dekretuar datën e zgjedhjeve.
Më 25 shtator, Komisioni Qendror i Zgjedhjeve u njoftua zyrtarish nga qeveria për shkarkimin e Erion Veliajt nga posti i kryebashkiakut dhe situatën e krijuar në bashkinë e Tiranës.
Edhe pse shkresa u bë publike ditën e djeshme, vetëm disa orë pasi Velij ankimoi vendimin për shkarkimin e tij në Kushtetuese.
Në ankimimin e dërguar në Kushtetuese, kryebashkiaku i shkarkuar i referohet nenit 62, i cili thekson se mungesa e tij në detyrë prej më shumë se tri muajsh nuk është për shkaqe që varen prej vullnetit të tij.
Sipas Veliajt, Këshilli i Ministrave nuk ka respektuar ligjin, i cili sqaron dhe rastet e shkarkimit.
