Në përballjen mes Milanit dhe Napolit, Luka Modric (40 vjeç) tregoi se ende mbetet një lojtar vendimtar. Ai jo vetëm që shkëlqeu në lojë, por fitoi edhe duelin fizik me Kevin De Bruyne (34 vjeç), i cili u duk shpesh i ngadaltë dhe u largua i irrituar kur Conte e zëvendësoi. Pas ndeshjes, Conte e goditi me një mesazh të fortë: “Shpresoj që u mërzit për rezultatin. Nëse për gjëra të tjera, ka zgjedhur personin e gabuar.”
Modric qëndroi në fushë deri në minutën e 97-të dhe u bë protagonist në dy momente kyçe shtesë: në minutën e 91-të devijoi një goditje që mund të kishte barazuar ndeshjen, ndërsa në fund pastroi një kros të rrezikshëm.
Nga ana tjetër, De Bruyne dha sinjale të klasit të tij vetëm nga goditjet e dënimit dhe një penallti e shënuar, por nuk arriti të ndikonte në lojën e hapur ndaj mbrojtjes solide të Milanit.
Massimiliano Allegri vlerësoi Modricin si lojtar inteligjent që i jep cilësi dhe ekuilibër skuadrës në rolin e organizatorit para mbrojtjes. Kroati, i dyti në Serie A për ndërprerje aksionesh, ka sjellë jo vetëm pasime dhe vizion, por edhe intensitet në lojë.
Ndeshja tregoi qartë se Modric nuk erdhi te Milani për një “vallëzim të fundit”, por për të qenë protagonist në Serie A dhe në Champions League — dhe ndoshta për t’u rikthyer edhe një herë në Bernabeu.
