Një 32-vjeçar shqiptar, i dënuar më parë për trafik kokaine dhe i dëbuar nga Italia për 10 vite, është arrestuar sërish nga policia italiane në Santa Maria degli Angeli.
Sipas mediave italiane, një patrullë ndaloi një makinë që transportonte tre persona. Pas identifikimit, shqiptari paraqiti një pasaportë të lëshuar nga autoritetet shqiptare, me vulën e fundit të hyrjes në Itali përmes kufirit tokësor me Kroacinë, të lëshuar rreth dhjetë ditë më parë.
Verifikimet e mëtejshme zbuluan se 32-vjeçari ishte dëbuar pesë vjet më parë dhe kishte një ndalim absolut kthimi deri në vitin 2030. Ai kishte qenë arrestuar më parë së bashku me dy bashkatdhetarë të tjerë për trafik kokaine nga policia e Perugias dhe më pas ishte liruar, me pjesën e mbetur të dënimit të pezulluar, dhe dëbuar nga territori italian.
